MSDhoni turns a year older, team a bit wiser

ధోని పుట్టినరోజును వేడుకలా జరుపుకున్న టీమిండియా

మిస్టర్ కూల్ మహేంద్ర సింగ్ ధోని 38వ ఏట అడుగుపెట్టాడు.1981 జులై7న ఝార్కండ్ రాజధాని రాంచిలో పాన్ సింగ్, దేవకీదేవీ దంపతులకు జన్మించాడు. ఈ లెజెండ్ కెప్టెన్, స్టార్ కీపర్ బ్యాట్స్ మన్ పుట్టినరోజు వేడుకల్ని ఆదివారం భారత క్రికెట్ జట్టు సభ్యులు వేడుకలా జరుపుకున్నారు. శ్రీలంకపై ఘన విజయం తర్వాత మాంచెస్టర్ కు బస్ లో బయలుదేరిన జట్టు సభ్యులు అందులోనే తమ ప్రియతమ ఆటగాడి జన్మదిన వేడుకల్ని ఆనందోత్సాహాలతో నిర్వహించారు. రికార్డుల స్టార్ ఓపెనర్ వైస్ కెప్టెన్ రోహిత్ శర్మ ఈ విషయాన్ని తెలిపాడు. జట్టు కెప్టెన్ విరాట్ కోహ్లి వాస్తవానికి తను నాయకుడైనా తమ సారథి ధోనియేనని ఈ సందర్భంగా పునరుద్ఘాటించాడు. జట్టు హోటల్ కు చేరుకున్నాక భార్య సాక్షి, కూతురు జీవా లతో కలిసి కేక్ కోసిన ధోని ఘనంగా పుట్టినరోజు జరుపుకున్నాడు. ఈ సందర్భంగా హార్ధిక్ పాండ్యా, రిషబ్ పంత్ లు సందడి చేశారు. ఈ వరల్డ్ కప్ తో ధోని రిటైర్మెంట్ కానున్నాడు. 2011 వరల్డ్ కప్ సచిన్ టెండుల్కర్ చివరి అంతర్జాతీయ క్రికెట్ టోర్నీ. ఆ కప్ ను ధోని సారథ్యంలోని భారత్ జట్టు గెలిచి సచిన్ కు కానుకగా సమర్పించింది. అప్పటి కెప్టెన్, వైస్ కెప్టెన్లు ధోని, యువరాజ్ సహా జట్టు మొత్తం వరల్డ్ కప్ ను పట్టుకుని ఉన్న సచిన్ టెండుల్కర్ ను భుజాలకెత్తుకుని కోల్ కతా ఈడెన్ గార్డెన్స్ మైదానమంతా కలియదిరుగుతూ సంబరం చేసుకుంది. 1983లో కపిల్ దేవ్ సారథ్యంలో తొలి వరల్డ్ కప్ ను భారత్ సాధించింది. క్రికెట్ మక్కాగా పేరోందిన లండన్ లార్డ్స్ మైదానంలో లిటిల్ మాస్టర్ సునీల్ గవాస్కర్ తదితర జట్టు సభ్యులు వరల్డ్ కప్ పట్టుకున్న కపిల్ దేవ్ చెయ్యిని సగర్వంగా పైకెత్తి అభినందించారు. ప్రస్తుతం ఆ మధురస్మృతుల్ని కోహ్లి, రోహిత్ సేన పునరావృతం చేయాల్సి ఉంది. ఇటీవల సచిన్ టెండుల్కర్ తర్వాత భారత జట్టు నుంచి అంతటి పేరు ప్రఖ్యాతుల్ని ప్రపంచ వ్యాప్తంగా పొందుతున్న గొప్ప క్రికెట్ యోధుడు ధోని. అతని రిటైర్మెంట్ ప్రకటన సమయానికి మరోసారి వరల్డ్ కప్ భుజాలకెత్తుకుని `మెన్ ఇన్ బ్లూ` ధోనికి ఘనంగా వీడ్కోలు చెప్పాలన్నదే కోటానుకోట్ల క్రికెట్ అభిమానుల ప్రగాఢ కోరిక.

Australia in struggling to chage 326 target, south africa in fight back

ఆస్ట్రేలియాను కంగు తినిపించిన దక్షిణాఫ్రికా

§  సెమీస్-1: భారత్ x న్యూజిలాండ్  §  సెమీస్-2: ఆస్ట్రేలియా x ఇంగ్లాండ్

కంగారూల జట్టు ఆస్ట్రేలియాపై కొదమసింహలా పోరాడిన దక్షిణాఫ్రికా 10 పరుగుల తేడాతో చిరస్మరణీయమైన విజయాన్ని సాధించింది. ఐసీసీ వరల్డ్ కప్-12 మాంచెస్టర్ ఎమిరేట్స్ ఓల్డ్ ట్రాఫర్డ్ మైదానంలో శనివారం జరిగిన ఆఖరి రౌండ్ రాబిన్ లీగ్ మ్యాచ్ నం.45 లో సఫారీల జట్టు టాస్ గెలిచి ముందు బ్యాటింగ్ కు దిగింది. నిర్ణీత 50 ఓవర్లలో 6 వికెట్ల నష్టానికి 325 భారీ పరుగుల్ని చేసింది. జట్టు కెప్టెన్ మ్యాన్ ఆఫ్ ద మ్యాచ్ గా ఎంపికయిన ఫాప్ డూప్లెసిస్(100) సెంచరీ సాధించాడు. రస్సీ వాండర్ సన్(95) ఆసిస్ బౌలర్లను దీటుగా ఎదుర్కొని పరుగుల వరద పారించాడు. ఓపెనర్లు అడెన్ మర్క్రామ్(34), కీపర్ బ్యాటర్ క్వింటాన్ డికాక్(52) రాణించడంతో భారీ స్కోరును ప్రత్యర్థి ఆస్ట్రేలియా ముందుంచారు. ఆసీస్ బౌలర్లలో మిషెల్ స్టార్క్, నాథన్ లయాన్ చెరో 2 వికెట్లు, జాసన్ బెరండ్రాఫ్, పాట్ కమిన్స్ చెరో 1 వికెట్ తీసుకున్నారు. అనంతరం 326 పరుగుల ఛేదన లక్ష్యంతో బ్యాటింగ్ ప్రారంభించిన కంగారూల జట్టు భారీ స్కోరయినా ప్రత్యర్థికి దాసోహం అనేదే లేదు అన్నట్లుగా పోరాడింది. ఓపెనర్ కెప్టెన్ ఆరన్ ఫించ్(3) స్పిన్నర్ తాహిర్ బౌలింగ్ లో మార్క్రమ్ కు క్యాచ్ ఇచ్చి త్వరగా పెవిలియన్ చేరాడు. మరో ఓపెనర్ సీనియర్ బ్యాట్స్ మన్ డేవిడ్ వార్నర్(122) టోర్నీలో మరో సెంచరీతో కదం తొక్కాడు. మిడిల్ ఆర్డర్ లో వికెట్ కీపర్ బ్యాట్స్ మన్ అలెక్స్ కేరె(85) పరుగులతో చివర్లో మెరుపులు మెరిపించినా జట్టులో చివరి వరుస బ్యాట్స్ మెన్ నిలబడకపోవడంతో విజయాన్ని సాధించిపెట్టలేకపోయాడు. మార్కస్ స్టోయినిస్(22) మాత్రమే జట్టులో చెప్పుకోదగ్గ పరుగులు చేశాడు. ఉస్మాన్ ఖవాజా(18), మిషెల్ స్టార్క్(16) స్కోరు అందుకునే క్రమంలో రబాడ వేసిన 49 ఓవర్లో వెంటవెంటనే వెనుదిరగడంతో చివరి 6 బంతుల్లో ఒక్క వికెట్ చేతిలో ఉండగా 18 పరుగులు చేయాల్సిన స్థితికి వచ్చింది. పెహ్లుక్వాయో వేసిన 50 ఓవర్ నాల్గు బంతుల్లో 7 పరుగులు మాత్రమే వచ్చాయి. చివరి రెండు బంతుల్లో 11 పరుగులు చేయాల్సి ఉండగా రనౌట్ నుంచి తప్పించుకున్న లయాన్ సిక్సర్ కొట్టే ప్రయత్నంలో మార్క్రమ్ క్యాచ్ పట్టగా ఔటయ్యాడు. బెరండ్రాఫ్(11*) నాటౌట్ గా మిగిలాడు. 49.5 ఓవర్లలో ఆసిస్ 315 పరుగులకు ఆలౌటయింది. సఫారీల బౌలర్లలో కగిసొ రబాడకు 3 వికెట్లు దక్కగా, డ్వయిన్ ప్రెటోరిస్ 2 వికెట్లు పడగొట్టాడు. ఇమ్రాన్ తాహిర్, క్రిస్ మోరిస్ లు చెరో వికెట్ తీశారు.

JD(S)-Cong govt under threat as 14 MLAs submit resignation

శర వేగంగా మారుతోన్న క`ర్ణాటక` రాజకీయాలు

కర్ణాటకలో రాజకీయ క్రీడ జోరందుకుంది. 13 నెలల కుమారస్వామి (జేడీ-యూ, కాంగ్రెస్ సంకీర్ణం) ప్రభుత్వం సంక్షోభాన్ని ఎదుర్కొంటోంది. సాక్షాత్తు సుప్రీంకోర్టు కల్గజేసుకుని అసెంబ్లీలో నాటి యడ్యూరప్ప మంత్రివర్గం విశ్వాస పరీక్షను ప్రత్యక్ష ప్రసారం చేయాలని ఆదేశించడంతో ఆయన బలం నిరూపించుకోలేక రాజీనామా చేసిన సంగతి తెలిసిందే. 224 మంది సభ్యుల విధానసభలో బీజేపీకి ప్రస్తుతం 104 మంది సభ్యుల బలం ఉంది. జనతాదళ్ (జేడీ-యూ)కు 37, కాంగ్రెస్ కు 78 మంది, బీఎస్పీ 1, ఇండిపెండెట్లుగా 2 సభ్యులున్నారు. ప్రభుత్వ ఏర్పాటుకు 113 మంది సభ్యుల బలం అవసరం కాగా తాజాగా 14 మంది తమ శాసనసభ్యత్వాలకు రాజీనామా చేస్తూ స్పీకర్ కె.ఆర్.రమేశ్ కుమార్ (కాంగ్రెస్)కు శనివారం లేఖలు సమర్పించారు. వీరిలో 13 మంది కాంగ్రెస్ ఎమ్మెల్యేలు కాగా 1 సభ్యుడు జేడీ(యూ)కి చెందిన వారు. 11 మంది ఎమ్మెల్యేల రాజీనామా లేఖలు తనకు అందినట్లు  స్పీకర్ విలేకర్లకు తెలిపారు. మంగళవారం వారితో వ్యక్తిగతంగా మాట్లాడి విధివిధానాల ప్రకారం వ్యవహరించనున్నామన్నారు. కుమారస్వామి సర్కార్ భవితవ్యం ఏమిటని విలేకర్లు ప్రశ్నించగా `వేచి చూద్దాం.. నేను చేసేది ఏమీ లేదు` అని స్పీకర్ రమేశ్ కుమార్ బదులిచ్చారు. మరోవైపు కాంగ్రెస్ ట్రబుల్ షూటర్ డి.కె.శివకుమార్ రంగంలోకి దిగి రాజీనామాలు చేసిన ఎమ్మెల్యేలతో సంప్రదింపులు జరుపుతున్నారు. గతంలో కూడా పలు సందర్భాల్లో కుమారస్వామి సంకీర్ణ సర్కార్ సమస్యల్లో చిక్కుకున్నప్పుడు డీకే నే ఎమ్మెల్యేల్ని సర్దుబాటు చేశారు.

Pakistan won by 94 runs against Bangladesh in icc world cup

బంగ్లాదేశ్ పై గెలిచినా సెమీస్ బెర్త్ దక్కని పాకిస్థాన్

లండన్ లార్డ్ వేదికపై శుక్రవారం జరిగిన ఐసీసీ వరల్డ్ కప్-12 మ్యాచ్ నం.43లో పాకిస్థాన్ జట్టు బంగ్లాదేశ్ ను 94 పరుగుల తేడాతో చిత్తు చేసింది. అయినా నెట్ రన్ రేట్ ఆధారంగా న్యూజిలాండ్ సెమీస్ చేరింది. ఈ రోజు మ్యాచ్ గెలవడమే కాక 300 పైకా పరుగుల ఆధిక్యంతో పాకిస్థాన్ గెలవాల్సిన పరిస్థితి. అయితే కుదిరితే గెలుపు లేదంటే తుదకంటా పోరాటమే లక్ష్యంగా బరిలో దిగే బంగ్లాదేశ్ ను పాకిస్థాన్ అంత తేలిగ్గా ఓడించడం సాధ్యమయ్యే పనికాదని మ్యాచ్ ఆరంభానికి ముందే అందరికీ తెలుసు. టాస్ గెలిచి తొలుత బ్యాటింగ్ కు దిగిన పాకిస్థాన్ 500కు పైగా పరుగులు చేయాలి.. దాంతో పాటు 200 పరుగులలోపే బంగ్లాదేశ్ ను ఆలౌట్ చేస్తేనే నెట్ రన్ రేట్ మెరుగై న్యూజిలాండ్ ను వెనక్కి నెట్టి పాకిస్థాన్ నాకౌట్ కు చేరుతుంది. కానీ పాకిస్థాన్ 50 ఓవర్లలో 9 వికెట్లు కోల్పోయి 315 పరుగులే చేసింది. దాని బట్టి బంగ్లాదేశ్ ను 15 పరుగుల లోపే ఆలౌట్ చేయాలి. అంతతేలిగ్గా బంగ్లాదేశ్ లొంగుతుందనే ఆశలు ఎవరికీ లేవు. దాంతో బంగ్లా ఇన్నింగ్స్ కు ముందే పాకిస్థాన్ సెమీస్ నుంచి ఔటయిన నిర్ణయానికి అందరూ వచ్చేశారు. తాజా గెలుపుతో టోర్నీలో మొత్తంగా 5 మ్యాచ్ ల విజయం 10 పాయింట్లు రద్దయిన మ్యాచ్ 1 పాయింట్ కలుపుకుని న్యూజిలాండ్ తో సమంగా 11 పాయింట్లు సాధించింది. అయితే నెట్ రన్ రేట్ ఆధారంగా న్యూజిలాండ్ నాకౌట్ కు చేరింది. ఆస్ట్రేలియా, భారత్, ఇంగ్లాండ్, న్యూజిలాండ్ సెమీస్ ఆడనున్నాయి.

బంగ్లాదేశ్ 316 పరుగుల లక్ష్య ఛేదనకు బ్యాటింగ్ ప్రారంభించి 6వ ఓవర్లో జట్టు స్కోరు 26 వద్ద సౌమ్య సర్కార్ వికెట్ కోల్పోయింది.  తమీమ్ ఇక్బాల్  జట్టు స్కోర్ 48 పరుగుల వద్ద రెండో వికెట్ గా పెవిలియన్ బాట పట్టాడు. ఆల్ గ్రేట్ ఆల్ రౌండర్ షకీబ్ అల్ హసన్ (64) మరో హాఫ్ సెంచరీ కొట్టాడు. లిటన్ దాస్(32), మహ్మదుల్లా (29) మాత్రమే రాణించడంతో 44.1 ఓవర్లలో 221 పరుగులకు ఆలౌటై ఓటమి పాలయింది. పాక్ మెరుపు బౌలర్ షాహిన్ అఫ్రిది చెలరేగిపోయి 35 పరుగులకే 6 వికెట్లు తీశాడు. ఈ వరల్డ్ కప్ లో షాహిన్ ఫీట్ మాత్రమే పాక్ కు మిగిలిన సంతృప్తి. ఇంతవరకు వరల్డ్ కప్ లో ఏ బౌలర్ ఆరు వికెట్లు పడగొట్టలేదు. షాదబ్ ఖాన్ 2 వికెట్లు, మహ్మద్ అమీర్, వహాబ్ రియాజ్ చెరో 1 వికెట్ తీసుకున్నారు. అంతకుముందు పాకిస్థాన్ ఇన్నింగ్స్ లో ఓపెనర్ ఇమామ్ ఉల్ హక్(100) సాధించగా బాబర్ ఆజమ్(96) మరోసారి చక్కటి ఇన్నింగ్స్ ఆడాడు. ఇమాద్ వసీం(43), మహ్మద్ హఫీజ్(27) రాణించారు. బంగ్లా బౌలర్లలో ముస్తాఫైజర్ రహ్మాన్ 5 వికెట్లు పడగొట్టాడు. మహ్మద్ సైఫుద్దీన్ 3 వికెట్లు తీసుకోగా మెహిదీ హసన్ 1 వికెట్ పడగొట్టాడు. మ్యాన్ ఆఫ్ ది మ్యాచ్ షాహిన్ ఆఫ్రిది గెల్చుకున్నాడు.