burqa ban not demand of shiv sena or uddhav:sena leader raut

శివసేన బురఖా నిషేధం కోరలేదు

శివసేన పార్టీ గానీ అధినేత ఉద్దవ్ థాకరే గానీ బురఖా నిషేధం కోరలేదని ఆ పార్టీ సీనియర్ నాయకుడు, రాజ్యసభ సభ్యుడు రౌత్ పేర్కొన్నారు. మే4 శనివారం ముంబయికి చెందిన న్యాయవాది మున్సిఫ్ ఖాన్ ముస్లిం సంప్రదాయ వస్త్రధారణకు సంబంధించి వారి మనోభావాలు దెబ్బతినేలా వ్యవహరించిన థాకరే, రౌత్ తదితరులపై చర్యలు తీసుకోవాలని పోలీసులను ఆశ్రయించారు. సీనియర్ సినీ గీత రచయిత జావేద్ అక్తర్ గురువారం మాట్లాడుతూ బురఖాను నిషేధించాలనుకుంటే రాజస్థాన్ లోని మహిళలు సంప్రదాయంగా ధరించే గున్ గాట్ ను నిషేధించాల్సి ఉంటుంది కదా అన్నారు. ఇదిలా ఉండగా శుక్రవారం పెద్ద సంఖ్యలో బురఖాలు ధరించిన ముస్లిం మహిళలు ముంబ్రా లోని సామ్నా పత్రిక కార్యాలయం వద్ద నిరసనల హోరెత్తించారు. రౌత్ కు వ్యతిరేకంగా నినాదాలు చేశారు. భారత రాజ్యాంగాన్ని రక్షించాలి..దేశాన్ని రక్షించాలి (Samvidhan Bachao, Desh Bachao) అంటూ నినదించారు. మారుతి డైలీకి ఎగ్జిక్యూటివ్ ఎడిటర్ గా వ్యవహరిస్తున్న రౌత్ సమస్య తీవ్రరూపం దాల్చకుండా వివరణ ఇచ్చారు. సామ్నాలో బుధవారం వచ్చిన సంపాదకీయంతో శివసేనకు లేదా ఉద్దవ్ థాకరేకు సంబంధం లేదని తేల్చి చెప్పారు. ఆ సంపాదకీయం ప్రధాని మోదీని శ్రీలంకలో మాదిరిగా దేశంలోనూ బురఖాను నిషేధించాలని సూచించింది. శ్రీలంకలో భయానక వరుస బాంబు పేలుళ్లకు సంబంధించి ఆ దేశం ఇటీవల తనిఖీల ఇబ్బందుల నేపథ్యంలో బురఖాలను నిషేధిస్తూ నిర్ణయం తీసుకున్న సంగతి తెలిసిందే. శాంతక్రజ్ సీనియర్ ఇన్ స్పెక్టర్ శ్రీరాం కొర్గాంకర్ తమకు మున్సిఫ్ ఖాన్ ఫిర్యాదు అందిందని అయితే ఎటువంటి కేసు నమోదు చేయలేదని తెలిపారు.

five BJP workers die as car falls into gorge in HP

కారు లోయలో పడి అయిదుగురు బీజేపీ కార్యకర్తల దుర్మరణం

హిమాచల్ ప్రదేశ్ లో ఆదివారం (మే5) కారు లోయలో పడిన దుర్ఘటనలో అయిదు భారతీయ జనతాపార్టీకి చెందిన కార్యకర్తలు దుర్మరణం పాలయ్యారు. భటిక్దర్ లో ముఖ్యమంత్రి జైరాం ఎన్నికల ర్యాలీకి హాజరయ్యేందుకు వీరంతా బయలుదేరినట్లు సమాచారం. కారు అదుపుతప్పి 300 మీటర్ల లోయలోకి జారి పడిపోయినట్లు తెలిసింది. ప్రమాదంలో కారు డ్రైవర్ ప్రాణాలతో బయటపడ్డాడు. అయితే అతనికి తీవ్ర గాయలుకావడంతో ఆసుపత్రికి తరలించి చికిత్స చేస్తున్నారు. డ్రైవర్ పరిస్థితి ఆందోళనకరగా ఉన్నట్లు తెలుస్తోంది. ప్రమాదానికి గల కారణాలు ఇంకా తెలియరాలేదు.

mj akbar deposes in criminal defamation case filed against lady journalist

పరువునష్టం కేసులో ఎంజే అక్బర్ ను విచారించిన కోర్టు

మీ టూ ఆరోపణల వెల్లువలో కేంద్ర విదేశాంగ శాఖ సహాయమంత్రి పదవికి రాజీనామా చేయాల్సి వచ్చిన ఎం.జె.అక్బర్ ను శనివారం(మే4) అడిషనల్ చీఫ్ మెట్రోపాలిటన్ మేజిస్ట్రేట్ సమర్ విశాల్ ఆధ్వర్యంలో రెండు గంటల పాటు క్రాస్ ఎగ్జామినేషన్ చేశారు. అక్బర్ ఎడిటర్ గా బాధ్యతలు వహిస్తున్న సమయంలో లైంగికంగా తనను వేధించారంటూ రమణి అనే జర్నలిస్ట్ పేర్కొనడంతో ఆమెపై పరువునష్టం దావా వేశారు. రమణి తరఫు న్యాయవాది రెబకా జాన్ క్రాస్ ఎగ్జామినేషన్ చేస్తూ అక్బర్ ను పలు అంశాలపై వివరాలు అడిగారు. రమణి తనపై చేసినవి తప్పుడు, అసత్య ఆరోపణలని అక్బర్ పునరుద్ఘాటిస్తూ తన పరువుకు నష్టం వాటిల్లినందున ఈ దావా వేయడం సహేతకమన్నారు. అయితే చాలా ప్రశ్నలకు అక్బర్ నాకు గుర్తు లేదు(ఐడోంట్ రిమెంబర్) అనే సమాధానమిచ్చారు. అక్టోబర్ 17, 2018లో ఆయన మంత్రి పదవికి రాజీనామా చేశారు. రమణి తనపై మీటూ ఆరోపణలు చేస్తూ సోషల్ మీడియా వేదికలకు ఎక్కడంతో అక్బర్ ఈ కేసు వేశారు. 20 ఏళ్ల క్రితం జర్నలిజంలో అడుగుపెట్టిన కొత్తలో తనను అక్బర్ వేధించారంటూ ఆమె సోషల్ మీడియాలో పోస్టులు పెట్టారు. కేసు తదుపరి విచారణ మే20న జరగనుంది.

Cheers and screams as new Japan emperor greets the people for the first time

ప్రజలకు తొలిసారి దర్శనమిచ్చిన జపాన్ కొత్త చక్రవర్తి

జపాన్ కొత్త చక్రవర్తిని చూడాలని దేశం నలుమూలల నుంచి పెద్ద సంఖ్యలో జనం తరలి రావడంతో సింహాసనం అధిష్ఠించిన కొత్త చక్రవర్తి నరుహిటో సతీసమేతంగా వారికి దర్శనమిచ్చి అభివాదాలు తెలిపారు. మే4 శనివారం టోక్యలోని రాజప్రాసాదం వరండా నుంచే ఆయన ప్రజల్ని ఉద్దేశించి మాట్లాడారు. చక్రవర్తిగా బాధ్యతలు చేపట్టాక నరుహిటో జన సందర్శనకు వెలుపలికి రావడం ఇదే ప్రథమం. తండ్రి అకిహిటో (85)వృద్ధాప్యం కారణంగానే సింహాసనాన్ని కొడుకు నరుహిటోకు అప్పగించిన సంగతి తెలిసిందే. నాటి చక్రవర్తి హిరోహిటో 1989లో మరణించడంతో ఆ సింహాసనాన్ని అకిహిటో అధిరోహించారు. అందుకు భిన్నంగా 200 ఏళ్ల రాచరిక వ్యవస్థలో తొలిసారిగా చక్రవర్తి జీవించి ఉండగానే వారుసుడు నరుహిటో గద్దెనెక్కారు. పసుపు రంగు దుస్తులు, సంప్రదాయ ఆభరణాలు ధరించిన సతీమణి మసాకోతో కలిసి పాశ్చాత్య దుస్తులు చిరునవ్వులు చిందిస్తూ నరుహిటో టోక్యోలోని ప్యాలస్ బాల్కనీలోకి వచ్చారు. వేల సంఖ్యలో హాజరైన జనం చక్రవర్తి దంపతుల్ని సంభ్రమాశ్చర్యాలతో తిలకించి తమ హర్షాన్ని వెలిబుచ్చారు. వాస్తవానికి న్యూఇయర్ వేడుకలు, చక్రవర్తి జన్మదినోత్సవం రోజునే ఈ విధంగా జనం ప్యాలస్ ఆవరణకు చేరుకుంటుంటారు. అయితే కొత్త చక్రవర్తిగా నరుహిటో గద్దెనెక్కడం ఆయనను కుటుంబాన్ని ఓసారి చూడాలని ఈసారి ఇక్కడ ప్రజలు ఉవ్విళ్లూరారు. ఈ సందర్భంగా నరుహిటో మాట్లాడుతూ ప్రజలంతా సంతోషంగా, ఆరోగ్యంగా జీవించాలని దేవుణ్ని కోరుతున్నానన్నారు. అదేవిధంగా జపాన్ సర్వతోముఖాభివృద్ధిని ఆకాంక్షిస్తున్నానని, ఇతర దేశాలన్నింటితో చేయిచేయి కలిపి ప్రపంచ శాంతికి పాటుపడతానని చెప్పారు.