Cheers and screams as new Japan emperor greets the people for the first time

ప్రజలకు తొలిసారి దర్శనమిచ్చిన జపాన్ కొత్త చక్రవర్తి

జపాన్ కొత్త చక్రవర్తిని చూడాలని దేశం నలుమూలల నుంచి పెద్ద సంఖ్యలో జనం తరలి రావడంతో సింహాసనం అధిష్ఠించిన కొత్త చక్రవర్తి నరుహిటో సతీసమేతంగా వారికి దర్శనమిచ్చి అభివాదాలు తెలిపారు. మే4 శనివారం టోక్యలోని రాజప్రాసాదం వరండా నుంచే ఆయన ప్రజల్ని ఉద్దేశించి మాట్లాడారు. చక్రవర్తిగా బాధ్యతలు చేపట్టాక నరుహిటో జన సందర్శనకు వెలుపలికి రావడం ఇదే ప్రథమం. తండ్రి అకిహిటో (85)వృద్ధాప్యం కారణంగానే సింహాసనాన్ని కొడుకు నరుహిటోకు అప్పగించిన సంగతి తెలిసిందే. నాటి చక్రవర్తి హిరోహిటో 1989లో మరణించడంతో ఆ సింహాసనాన్ని అకిహిటో అధిరోహించారు. అందుకు భిన్నంగా 200 ఏళ్ల రాచరిక వ్యవస్థలో తొలిసారిగా చక్రవర్తి జీవించి ఉండగానే వారుసుడు నరుహిటో గద్దెనెక్కారు. పసుపు రంగు దుస్తులు, సంప్రదాయ ఆభరణాలు ధరించిన సతీమణి మసాకోతో కలిసి పాశ్చాత్య దుస్తులు చిరునవ్వులు చిందిస్తూ నరుహిటో టోక్యోలోని ప్యాలస్ బాల్కనీలోకి వచ్చారు. వేల సంఖ్యలో హాజరైన జనం చక్రవర్తి దంపతుల్ని సంభ్రమాశ్చర్యాలతో తిలకించి తమ హర్షాన్ని వెలిబుచ్చారు. వాస్తవానికి న్యూఇయర్ వేడుకలు, చక్రవర్తి జన్మదినోత్సవం రోజునే ఈ విధంగా జనం ప్యాలస్ ఆవరణకు చేరుకుంటుంటారు. అయితే కొత్త చక్రవర్తిగా నరుహిటో గద్దెనెక్కడం ఆయనను కుటుంబాన్ని ఓసారి చూడాలని ఈసారి ఇక్కడ ప్రజలు ఉవ్విళ్లూరారు. ఈ సందర్భంగా నరుహిటో మాట్లాడుతూ ప్రజలంతా సంతోషంగా, ఆరోగ్యంగా జీవించాలని దేవుణ్ని కోరుతున్నానన్నారు. అదేవిధంగా జపాన్ సర్వతోముఖాభివృద్ధిని ఆకాంక్షిస్తున్నానని, ఇతర దేశాలన్నింటితో చేయిచేయి కలిపి ప్రపంచ శాంతికి పాటుపడతానని చెప్పారు.

tiger found dead in corbett, 3rd big cat death this year

ఉత్తరాఖండ్ అడవుల్లో పెద్దపులి మృతి

ఉత్తరాఖండ్ రాష్ట్రం నైనిటాల్ పరిధిలోని కాబొంట్ టైగర్ రిజర్వ్(సీటీఆర్) పారెస్ట్ లో శుక్రవారం సాయంత్రం పెద్దపులి కళేబరాన్ని కనుగొన్నారు. మృతి చెందిన పులికి పదేళ్లుండొచ్చని అటవీశాఖ అధికారులు తెలిపారు. మృతికి గల కారణాలు స్పష్టం కాలేదు. అయితే పులులు ఒకదానితో మరొకటి పోరాడిన సందర్భాల్లోనే ఎక్కువగా వీటి మరణాలు సంభవిస్తుంటాయని అటవీ అధికారులు భావిస్తున్నారు. ఈ ఏడాది ఈ అడవుల్లో పులి మృత్యువాత పడిన ఘటనల్లో ఇది మూడోది. పులి మృతి చెందిన పరసరాల్లో నీటి వాగులు వద్ద, నేలపైన నమూనాల్ని సేకరించారు. పులి శరీరంలోని అంతర్భాగాల నమూనాల్ని సేకరించి భద్రపరిచారు. పులి కళేబరానికి పరీక్షలు నిర్వహించాక దహన కార్యక్రమాలు పూర్తి చేశారు.

churches in colombo cancel sunday mass due to threat

కొలంబో చర్చిల్లో ఈ ఆదివారమూ ప్రార్థనల రద్దు

అంతర్జాతీయ నిఘా వర్గాల హెచ్చరికల నేపథ్యంలో కొలంబో కేథలిక్ చర్చిల్లో వరుసగా రెండో ఆదివారం ప్రార్థనలు రద్దు చేశారు. ఈ మేరకు  శ్రీలంక ప్రభుత్వ వర్గాలు ఒక ప్రకటనలో తెలిపాయి. కొలంబో ఆర్చిబిషప్ మాల్కం రంజిత్ విలేకర్లతో మాట్లాడుతూ కొలంబో సహా పరిసర ప్రాంతాల్లోని అన్ని కేథలిక్ విద్యాసంస్థల్ని ఇంకా తెరవలేదని తెలిపారు. ఏప్రిల్ 21 ఈస్టర్ సండే వరుస బాంబు దాడుల అనంతరం నెలకొన్న భయానక వాతావరణం దేశంలో ఇంకా కొనసాగుతోంది. మరోసారి ఇస్లామిక్ ఉగ్రవాదులు విరుచుకుపడే ప్రమాదముందని శ్రీలంక ఈ మేరకు నిర్ణయం తీసుకుంది. దేశంలో హై అలర్ట్ కొనసాగుతోంది. పాఠశాలలు, ఇతర విద్యాసంస్థల్ని సోమవారం తెరవనున్నారు. అయితే ప్రతి విద్యాసంస్థ వద్ద కనీసం ఒక సాయుధ పోలీసును కాపాలా ఉంచనున్నారు. ఈ మేరకు శ్రీలంక విద్యా మంత్రిత్వ శాఖ భద్రత బలగాలకు ఆదేశాలచ్చింది. దేశంలో ఇంకా చాలా ప్రాంతాల్లో పూర్తి భద్రతా వాతావరణం ఏర్పడలేదని భావిస్తున్నారు. అయితే అధికారంగా దీనిపై వ్యాఖ్యానించడానికి నిఘా, భద్రత విభాగాలకు చెందిన ఉన్నతాధికారులు నిరాకరించారు.

naidu calls for public transport centric approach to combat growing vehicular pollution

ప్రజా రవాణా వ్యవస్థ ఆదరణతోనే పర్యావరణ పరిరక్షణ: ఉపరాష్ట్రపతి

ప్రజలందరూ వ్యక్తిగత వాహనాల వినియోగాన్ని తగ్గించి ప్రజారవాణా వ్యవస్థ పట్ల మొగ్గు కనబరిస్తేనే వాతావరణ కాలుష్యానికి అడ్డుకట్ట పడుతుందని భారత ఉపరాష్ట్రపతి వెంకయ్యనాయుడు అన్నారు. ఢిల్లీ మెట్రో రైలు(డీఎంఆర్సీ) 25వ వ్యవస్థాపక దినోత్సవాన్ని పురస్కరించుకుని మే3 శుక్రవారం ఆయన ఈ కార్యక్రమంలో ప్రసంగించారు. పర్యావరణ పరిరక్షణ, వాయు కాలుష్యానికి చరమగీతం పాడాలన్న స్పృహ ప్రతి ఒక్కరిలో రావాలని అప్పుడే స్వచ్ఛమైన వాతావరణాన్ని పొందగలమన్నారు. అందుకు అందరూ ప్రజారవాణా వ్యవస్థను తప్పనిసరిగా వినియోగించుకోవాలని కోరారు. వాయు కాలుష్యం అంతకంతకు ప్రమాదకర స్థాయికి చేరుకోవడంలో వ్యక్తిగత వాహనాల సంఖ్య అడ్డూ అదుపు లేకుండా పెరిగిపోవడమే కారణమని ఉపరాష్ట్రపతి చెప్పారు. ముఖ్యంగా నగరాల్లో కార్లు ద్విచక్ర వాహనాల సంఖ్య శరవేగంగా పెరుగుతూ పోతోందన్నారు. 1994 నాటికి మెట్రో నగరాల్లో ప్రతి 1000 మంది వ్యక్తులలో కార్లు, ద్విచక్ర వాహనాలు కల్గిన వారి నిష్పత్తి 14, 112 కాగా 2021 నాటికి ఆ సంఖ్య 48, 393కు పెరగనున్నట్లు చెబుతూ ఆయన ఇది వాతావరణ కాలుష్యం పెరగడానికి ప్రమాద సంకేతమని తెలిపారు. రాబోయే 15 ఏళ్లల్లో మెట్రో నగరాల్లో ద్విచక్ర వాహనాల సంఖ్య 5 కోట్ల 30 లక్షలు, కార్ల సంఖ్య 60 లక్షలకు చేరుకోనున్నట్లు చెప్పారు. ఈ పరిస్థితిని తప్పించేందుకు ప్రజారవాణా వ్యవస్థ ఒక్కటే మార్గమన్నారు. దేశంలో ప్రస్తుత మెట్రో రైలు రవాణా వ్యవస్థల అమలు తీరు పట్ల ఉపరాష్ట్రపతి సంతృప్తి వ్యక్తం చేశారు. కార్యక్రమంలో డి.ఎస్.మిశ్రా (డీఎంఆర్సీ చైర్మన్, గృహ, పట్టణాభివృద్ధి శాఖ కార్యదర్శి), డాక్టర్. మంగుసింగ్(ఎండీ, డీఎంఆర్సీ), కె.కె.సబర్వాల్ (డైరెక్టర్ ఫైనాన్స్), డీఎంఆర్సీ ఇతర అధికారులు సిబ్బంది పాల్గొన్నారు.