yes i had a quarrel with power star pawan kalyan comedy king ali

అవును..పవన్ తో గొడవయిందన్న అలీ

పవర్ స్టార్ పవన్ కల్యాణ్‌తో గొడవ అయిన మాట నిజమేనని హాస్యనటుడు అలీ అంగీకరించాడు. ఇటీవల ‘ఆలీతో సరదాగా’ అనే టీవీ షోకు వచ్చిన పవన్ మాజీ సతీమణి రేణూ దేశాయ్ నవ్వుతూ ఎదురుప్రశ్న వేశారు. సరదాగా అడుగుతున్నట్లున్నా నిజానికి నేను ఓ సీరియస్ ప్రశ్న వేస్తున్నానంటూ ఆమె అలీతో `మీకు కల్యాణ్ గారికి చాలా పెద్ద గొడవైందని విన్నాను. నిజమేనా?` అని సూటిగా అడిగారు. వెంటనే అలీ కూడా తడుముకోకుండా అవును..నిజమేనంటూ ఠకీమని సమాధానమిచ్చాడు. బాల నటుడిగా సినీ పరిశ్రమలోకి అడుగుపెట్టిన అలీ నాలుగు దశాబ్దాలుగా పలు చిత్రాల్లో నటిస్తున్నాడు. పవన్ కల్యాణ్ సినిమాల్లోకి వచ్చాక ఆయనతోను కలిసి నటిస్తూ సన్నిహితమయ్యాడు. ఆ తర్వాత చాలా ఏళ్లుగా వీరిద్దరూ మంచి మిత్రులుగా ఉన్నారు. రాజకీయాల్లోకి రావాలని చాలా ఏళ్లగా అలీ ఎదురుచూస్తున్నారు. ఈ నేపథ్యంలో అలీ వైఎస్ఆర్ కాంగ్రెస్ పార్టీలో చేరడానికి ముందు పవన్ కల్యాణ్‌తో ఏపీ సీఎం చంద్రబాబుతోనూ భేటీ అయిన సంగతి తెలిసిందే. అలీ అలా వైఎస్ఆర్ సీపీలో చేరగానే `అసలు ఎవరినీ నమ్మాలో నమ్మకూడదో తెలియడం లేదు` అని జనసేన అధినేత పవన్ కల్యాణ్ వ్యాఖ్యానించారు. అలీ లాంటి వ్యక్తిని తాను ఇంతవరకూ చూడలేదని, సాయం పొంది మోసం చేశాడని పవన్ తీవ్రంగా ఆరోపించారు. అలీ కూడా ఆ ఆరోపణల్ని గట్టిగానే తిప్పికొట్టారు. పవన్ తనకు ఆర్థికంగా ఏదైనా సాయం చేశారా? అంటూ ఎదురు ప్రశ్నించారు.

sc directs ec to watch pm modi biopic full movie submit decision in sealed cover

మోదీ బయోపిక్ సినిమా చూసి సీల్డ్ కవర్లో నివేదికివ్వండి

·    ఈసీకి సుప్రీంకోర్టు ఆదేశం

ప్రధాని మోదీపై నిర్మించిన బయోపిక్ సినిమాను పూర్తిగా చూశాక నివేదికను తమకు సీల్డ్ కవర్ లో పంపాల్సిందిగా కేంద్ర ఎన్నికల సంఘాన్ని(ఈసీ) సుప్రీంకోర్టు ధర్మాసనం ఆదేశించింది. మోదీ బయోపిక్ సార్వత్రిక ఎన్నికలు ముగిసే వరకు ప్రదర్శించరాదని ఈసీ నిషేధించిన సంగతి తెలిసిందే. ఈసీ నిర్ణయంపై స్టే విధించాలని ఆ సినిమా నిర్మాతలు సుప్రీంకోర్టులో పిటిషన్ వేశారు. ఆ పిటిషన్ ను సోమవారం(ఏప్రిల్15) ప్రధాన న్యాయమూర్తి రంజన్ గొగొయ్ నేతృత్వంలోని ధర్మాసనం విచారించి ఈ మేరకు తీర్పిచ్చింది. కేవలం సినిమా ప్రోమోలను చూసి ఈసీ నిషేధం నిర్ణయాన్ని అమలు చేయడం తగదని నిర్మాతల తరఫున న్యాయవాది ముకుల్ రోహ్టగి వాదించారు. శుక్రవారం (ఏప్రిల్19) లోపుగా నివేదికను తమకు అందజేయాలని కోరింది. ఈనెల 22 న (సోమవారం) మోదీ బయోపిక్ పై తుది తీర్పు వెలువడనుంది.

jet airways crisis deepens no flight from monday

జెట్ విమానాలు నేటి నుంచి బంద్

·   ఎయిర్ వేస్ సంక్షోభం తీవ్రతరం

ఆర్థిక సంక్షోభంలో కూరుకుపోయిన జెట్ ఎయిర్ వేస్ సంస్థ పైలట్ల విధులు బహిష్కరణ ప్రకటనతో మరో సమస్యలోకి జారుకుంది. దాంతో సోమవారం (ఏప్రిల్15) నుంచి జెట్ విమానాలు ఎగరబోవడం లేదని తెలిసింది.  నేషనల్ ఏవియేటర్స్ గిల్డ్(ఎన్.ఎ.జి) ఈ మేరకు నిర్ణయం తీసుకుంది. ఎన్ఏజీలో 1100 మంది పైలట్లు సభ్యులుగా ఉన్నారు. ఒక్క జెట్ ఎయిర్ వేస్ లోనే 1600 మంది పైలట్లు విధులు నిర్వహిస్తున్నారు. పైలట్లతో పాటు జెట్ ఇంజినీర్లు, సీనియర్ మేనేజర్లు కూడా విధులు బహిష్కరిస్తున్నట్లు ప్రకటించారు. జనవరి నుంచి వీరందరికీ జీతాలు అందడం లేదని సమాచారం. అయితే జెట్ యాజమాన్యం సంస్థ మనుగడను కాపాడ్డానికి ప్రాథమిక పెట్టుబడిగా ఎస్.బి.ఐ నుంచి రూ.1500 కోట్ల రుణ మంజూరు కోరింది. జెట్ సిబ్బంది అందరికీ ఆ మొత్తం రాగానే బకాయిలన్నీ చెల్లిస్తామని నచ్చజెబుతూ వచ్చింది. అయితే ఆ ప్రణాళికా బెడిసికొట్టిన మీదట జెట్ సిబ్బంది సమ్మె బాట పట్టారు. సంక్షోభానికి ముందు జెట్ సంస్థ రోజూ 120 విమానాల్ని నడిపేది. ఆ తర్వాత ఆ సంఖ్యను రోజుకు 15 కు కుదించింది. ఇప్పుడు పూర్తిగా సర్వీసుల బంద్ దశకు చేరుకుంది.

elephant kills oldaged pilgrim injures two others in poondi reserve forest

ఏనుగు దాడిలో వృద్ధ భక్తుడి మృతి ఇద్దరికి గాయాలు

దైవ దర్శనానికి వచ్చిన 60 ఏళ్ల వృద్ధ భక్తుడు ఏనుగు దాడిలో దుర్మరణం చెందాడు. ఈ దుర్ఘటన ఆదివారం పూండి రిజర్వ్ ఫారెస్ట్ కు 30కిలోమీటర్ల దూరంలో జరిగింది. ఏనుగు దాడిలో మరో ఇద్దరు తీవ్ర గాయాల పాలయినట్లు పోలీసులు తెలిపారు. ఇక్కడకు సమీపంలోని వెలియాన్ గిరిలో కొండపై పురాతన దేవాలయాన్ని సందర్శించుకోవడానికి పలువురు భక్తులు బయలుదేరారు. వీరంతా మార్గమధ్యంలో సెలయారులో నీళ్లు తాగేందుకు ఆగారు. అకస్మాతుగా అడవిలో నుంచి దూసుకువచ్చిన ఏనుగు ఆరుసామి(60) అనే వృద్ధుడ్ని కాళ్లతో తొక్కేసింది. దాంతో అతను అక్కడికక్కడే దుర్మరణం పాలయ్యాడు. మరో ఇద్దరిపైన ఏనుగు విరుచుకుపడగా తీవ్ర గాయాలపాలయ్యారు. మరికొందరు భక్తులు మాత్రం ఏనుగు దాడి నుంచి చాకచక్యంగా తప్పించుకుని బయటపడినట్లు సమాచారం.