116 iron nails wire removed from man's stomach in rajasthan faridabad

రాజస్థాన్ లో వ్యక్తి పొట్ట నుంచి 112 మేకుల్ని వెలికితీసిన వైద్యులు

రాజస్థాన్ లో ఓ వ్యక్తి కడుపులో వందల సంఖ్యలో మేకుల్ని కనుగొన్న వైద్యులు ఆశ్చర్యానికి గురయిన ఘటన ఇది. తీవ్రంగా కడుపు నొప్పితో బాధ పడుతున్న బుండికి చెందిన 42 ఏళ్ల భోలా శంకర్ కు ఫరిదాబాద్ ప్రభుత్వాసుపత్రి వైద్యులు సోమవారం (మే13) శస్త్ర చికిత్స చేసి మేకుల్ని తొలగించారు. ఏకంగా 6.5 సె.మీ. పొడవుగల 112 మేకుల్ని చూసిన వైద్యులు ఆశ్చర్యచకితులయ్యారు. కొద్ది రోజుల క్రితం డాక్టర్ అనిల్ సైనీ సీటీ స్కాన్, ఎక్స్ రేలు తీసి శంకర్ కడుపులో మేకులున్నట్లు కనుగొన్నారు. అతనికి సోమవారం శస్త్ర చికిత్స నిర్వహించి వాటిని విజయవంతంగా తొలగించారు. శంకర్, అతని కుటుంబ సభ్యులు తోట పనులు చేస్తుంటారు. అంత పొడవాటి మేకుల్ని శంకర్ ఎలా మింగాడన్నది వైద్యులకు అంతుచిక్కడం లేదు. పెద్ద సంఖ్యలో గల ఆ మేకులన్నీ శంకర్ జీర్ణకోశంలోని చిన్న ప్రేవుల్లోకి చేరుకుంటే ప్రాణానికి హాని జరిగేదని డా.సైనీ తెలిపారు.  అంతేగాక అతని కడుపులో నుంచి ఓ ఇనుప తీగను, ఇనుప గుళికను కూడా విజయవంతంగా వెలికి తీశామన్నారు. ప్రస్తుతం శంకర్ ఆరోగ్య పరిస్థితి నిలకడగా ఉందన్నారు. అతని మానసిక స్థితిపై కూడా పరీక్షలు నిర్వహించాల్సి ఉందని చెప్పారు. ఇదే తరహా శస్త్ర చికిత్సను ఫరిదాబాద్ వైద్యులు 2017లోనూ నిర్వహించి ఓ వ్యక్తి ప్రాణాల్ని కాపాడారు. బద్రియల్(56) కడుపులో నుంచి 2.5 సె.మీ పొడవున్న 150 సూదుల్ని నాడు వైద్యులు తొలగించారు.